Nick Cannon, eiginmaður söngkonunnar Mariuh Carey, vill meina að eiginkona hans hafi ekki hugmynd um hver raunveruleikastjarnan Kim Kardashian sé. Cannon sagði frá þessu eftir að hafa viðurkennt að hafa sængað hjá raunveruleikastjörnunni.
Cannon var í viðtali hjá Howard Stern á dögunum þar sem hann sagði að Carey þekkti ekki raunveruleikastjörnuna. „Hún veit ekki einu sinni hver Kim Kardashian er, af því að hún er ekki að velta sér upp úr slíku,“ sagði Cannon.
Athugasemd Cannon um Carey kom viku eftir að hann sagðist í útvarpsþætti hafa verið í sambandi við Kardashian.
Cannon sagði eftir viðtalið að Carey hefði ekki verið sérstaklega ánægð með að Cannon væri að tala um einkalíf sitt í viðtalinu, en bætti við að hjónabandið væri betra en nokkurt samband sem hann hefði verið í.