Söngkonan Miley Cyrus þurfti að fara á spítala á dögunum en hún fékk alvarlegt ofnæmiskast vegna sýklalyfja sem hún tók inn.
Cyrus, sem er 21 árs gömul, átti að koma fram á tónleikum í Kansas, en hún þarf að taka því rólega samkvæmt læknisráði, eins og segir á vefsíðu poppsöngkonunnar.
Samkvæmt heimildum Huffington Post er Cyrus að jafna sig.
Hún sendi aðdáendum sínum skilaboð í kjölfarið, en henni þótti mjög fyrir því að geta ekki haldið tónleikana.
„Kansas ég lofa því að ég er jafn leið yfir þessu og þið. Ég vildi svo mikið vera með ykkur í kvöld. Að vera ekki með ykkur lætur mér líða verr en mér nú þegar líður,“ sagði Cyrus í skilaboðunum.