Trúlega kannast margir við strandblak þar sem tveir fáklæddir einstaklingar spila gegn tveimur á heitum ströndum úti í hinum suðræna heimi. Nú er hins vegar spilað strandblak í snjó og það helst í meira en tvö þúsund metra hæð í Ölpunum.
Snjóblak var fyrst spilað árið 2009 en nú er þetta orðið töluvert vinsæl íþrótt og var sérstök mótaröð sett á laggirnar á síðasta ári. Stoppar mótaröðin í Austurríki, Þýskalandi, Ítalíu og Sviss þetta árið.
Í vikunni var keppt í Austurríki þar sem 15 þúsund manns mættu til að horfa á strandblak í snjó. Vona skipuleggjendur mótaraðarinnar að mótið geti svo farið víðar um Evrópu og jafnvel um heiminn. Horfa þeir sérstaklega til Bandaríkjana og Austur-Evrópu.
Reglurnar í snjóblaki eru eins og í strandblaki. Tveir spila saman gegn tveimur og má nota þrjár snertingar til að koma boltanum yfir netið. 50 lið voru skráð í mótið í Austurríki þar sem mátti sjá heims- og Evrópumeistara sem og Ulrike Pfletschinger, sem er ein skærasta stjarna Þjóðverja í kvennablaki.