Bættu bara við vatni og hrærðu. Alkóhól í púðurformi er það nýjasta frá bandaríska áfengisframleiðandanum Lipsmark og kemur í sex mismunandi útfærslum.
Púðrinu á að blanda út í vatn þannig að útkoman verður annað hvort romm eða vodka. Í tilkynningu frá framleiðandanum segir að jafnvel sé hægt að sáldra púðrinu yfir mat. Þá er fyrirhugað að hefja framleiðslu á öðrum tegundum þannig að úr komi til dæmis Mojito-, Margarítu- eða Cosmopolitan kokteill.
Púðrið hefur hlotið samþykki frá Tóbaks- og áfengisráði Bandaríkjanna en framleiðandinn á eftir að fá einkaleyfisrétt fyrir framleiðslunni.
Framleiðandinn vonast til þess að áfengispúðrið komi í verslanir með haustinu.