Það er ástæða fyrir því að söngkonan Mariah Carey hefur á sér orð fyrir að vera mikil prímadonna, en sem dæmi þá eyðir hún rúmum fimm milljónum króna á ári í hársnyrtingu fyrir hundana sína til þess að þeir líti sem best út.
Hundarnir hennar Carey eru átta talsins en þeir fara í hár-, nagla- og andlitssnyrtingu í hverjum mánuði. Einnig fara þeir reglulega í rasssnyrtingu.
Hundarnir, Cha Cha, Jackie Lambchops, JJ , Jill E Beans, Squeak E Beans, The Good Reverend Pow Jackson, Pipitty L Jackson og Mutley P Gore Jackson The Third, eru með mann í fullri vinnu við að sjá um sig á Rainbow Pet-snyrtistofunni.
„Carey borgar allar meðferðirnar sjálf og hún býst ekki við neinni sérmeðferð. Aðeins hundarnir hennar fá sérmeðferð,“ sagði heimildarmaður The Mirror og bætti við: „Almenn meðferð fyrir hund kostar 7.500 krónur, og aðrar meðferðir kosta meira. Hundarnir hennar Carey virðast njóta þess í botn að fá nudd og fleira sem stofan býður upp á.“