Kólumbíska söngkonan Shakira mun syngja á Maracana-leikvanginum í kvöld áður en úrslitaleikur HM hefst. Þetta er í þriðja skiptið sem hún kemur fram á úrslitaleiknum á HM.
Hún segir að fótboltinn hafi breytt lífi sínu. „Ég mun aldrei gleyma því þegar ég hitti ást lífs míns á HM.“
Shakira og spænski varnarmaðurinn Gerard Pique kynntust þegar HM-lagið 2010 „Waka Waka - Time for Africa“ var kynnt og nú eiga þau saman átján mánaða son. „Ef það væri ekki fyrir HM væri sonur minn Milan ekki til.“
Í kvöld syngur hún HM-lagið í ár, „La La La“, ásamt brasilíska tónlistarmanninum Carlinhos Brown.