„Ég snerti bikarinn, hélt á bikarnum, kyssti bikarinn og tók selfie með bikarnum. Hvernig hljómar þinn „bucket list“, félagi? Þetta skrifaði söngkonan Rihanna á twittersíðu sína í gærkvöldi eftir að hún hafði birt myndir af sér umkringdri þýsku leikmönnunum.
Það hefur ekki farið á milli mála að Rihanna hefur mikinn áhuga á heimsmeistaramótinu. Hún hefur verið dugleg á samfélagsmiðlum að tjá sig um mótið, og þá sérstaklega þýska liðið. Er það sér í lagi framherjinn markheppni Miroslav Klose sem er í uppáhaldi hjá henni.
Í gær náði gleðin svo hámarki þegar Þjóðverjar urðu heimsmeistarar. Rihanna var ekki langt undan og kíkti á þýsku leikmennina og tók myndir af sér með þeim.