Hinn 27 ára gamli Lee Weir skráði sig á spjöld sögunnar í vikunni þegar hann varð sá einstaklingur sem er með flest Homer Simpson húðflúr. Weir fékk heimsmetið skráð í Heimsmetabók Guinness.
Alls er Weir með 41 húðflúr af Hómer, en heimilisfaðirinn frægi úr teiknimyndaþáttunum um Simpson-fjölskylduna er í mismunandi ástandi í hverju flúri.
Í frétt Daily Mirror af málinu segir Weir að hann hafi ákveðið að fá sér húðflúrin vegna þess að í æsku var honum bannað að horfa á fjölskylduna gulu í sjónvarpinu.
Raunar segir Weir að faðir sinn sé Ned Flanders holdi klæddur, en Flanders er þekkt persóna úr þáttunum sem hefur boð og bönn í hávegum.