Matreiðslumaðurinn og sjónvarpsþáttastjórnandinn Gordon Ramsay kenndi Bradley Cooper að blóta fyrir kvikmyndahlutverk, að því er dagblaðið The Metro greinir frá.
Leikarinn hitti Gordon Ramsay í London og í Feneyjum til að fá ráðleggingar fyrir hlutverk sitt sem kokkur í kvikmyndinni Adam Jones. Þá kenndi Ramsey honum einnig ýmislegt slangur sem fylgir matreiðslulífinu og ýmislegt sem þarft er að vita um lífsstíl í kringum matseld.
Ramsay segist hafa haft tíma eftir að tökum lauk á vinsælli þáttaröð hans Kitchen Nightmares en hann hefur ákveðið að þetta verði síðasta þáttaröðin.
Hann hefur gert 12 þáttaraðir með 123 þáttum og hafa þættirnir gengið í tíu ár.
Cooper leikur kokk í kvikmyndinni Adam Jones en kvikmyndinni leikstýrir John Wells. Ásamt Cooper fara Uma Thurman, Sienna Miller og Emma Thompson með hlutverk í myndinni.
Kvikmyndatökur eru hafnar í New Orleans í Bandaríkjunum en tökur munu einnig eiga sér stað í London frá næstu viku og fram í september.