Lögreglan leitar að félaga Cyrus

Jesse Helt, sem lýsti aðstæðum heimilislausra á MTV hátíðinni á sunnudag er leitað af lögreglunni í Oregon fyrir brot á skilorði. Helt kom fram á hátíðinni með söngkonunni Miley Cyrus en myndbandið við lag hennar Wreckin Ball var valið besta tónlistarmyndbandið á hátíðinni.

Í frétt Guardian kemur fram að handtökuskipun á hendur honum sé síðan árinu 2011 vegna þess að hann hafi brotið skilorð. Helt, sem er 22 ára gamall, var handtekinn árið 2010 fyrir að hafa brotist inn í íbúð manns sem Helt taldi að hefði selt sér lélegt marijúana. Lögreglan í Salem ákærði hann og játaði hann sök. Var hann dæmdur í 30 daga skilorðsbundið fangelsi.

Í einhvern tíma tilkynnti hann sig reglulega hjá skilorðsfulltrúa sínum en síðan hélt hann til Los Angeles þar sem hann hefur búið á götunni og notið aðstoðar frá hjálparsamtökunum My Friend's Place en það var einmitt í gegnum þau sem hann komst í kynni við Cyrus en söngkonan kom í heimsókn til samtakanna þann 19. ágúst sl.

Samkvæmt Guardian ákvað Cyrus, innblásin af Marlon Brando, sem árið 1973 notaði tækifærið á Óskarsverðlaunahátíðinni til þess að gagnrýna stefnu stjórnvalda gagnvart frumbyggjum, að bjóða Helt á hátíðina með sér.

Þegar tilkynnt var um að myndband hennar hefði verið valið myndskeið ársins ákvað hún að biðja Helt um að ávarpa samkomuna í sinn stað. „Ég heiti Jesse,“ sagði hann. „Ég þigg þessi verðlaun fyrir hönd þeirra 1,6 milljóna ungmenna sem annað hvort hafa flúið að heiman eða eru heimilislausir í Bandaríkjunum. Sem svelta, áttavillt og hrædd um líf sitt á þessari stundi. Ég veit þetta því ég er einn þeirra.“