Mike Leigh heiðursgestur RIFF

Breski leikstjórinn Mike Leigh mun verða heiðursgestur á Alþjóðlegu kvikmyndahátíðinni í Reykjavík (RIFF) sem hefst 25. september næstkomandi. Að auki mun nýjasta kvikmynd hans, Mr. Turner, verða sýnd á hátíðinni.

Von er á honum til landsins í lok september.

Hann mun veita heiðursverðlaunum RIFF móttöku á Bessastöðum. Eins og fyrri ár, er það herra Ólafur Ragnar Grímsson sem mun afhenda þau.

Mr. Turner var frumsýnd á kvikmyndahátíðinni í Cannes í vor. Ásamt því að vera tilnefnd til Gullpálmans þá vann aðalleikari myndarinnar, Timothy Spall, leikendaverðlaunin á hátíðinni.

Kvikmyndin fjallar um ævi og störf eins mesta málara Breta, J.M.W. Turner, sem var álitinn mikill sérvitringur á sínum tíma en hann lagði grunninn að auknum hróðri landslagsmynda í málaralist á 19. öld.

„Það er óhætt að segja að Mike Leigh sé einn mikilvægasti og áhrifamesti leikstjóri 10. áratugarins, en eftir feril í leikhúsi og sjónvarpi, festi Leigh sig í sessi með hinum stórkostlegu kvikmyndaverkum, Naked (1993) sem var tilnefnd til Gullpálmans í Cannes, og Secrets and Lies (1996), sem hreppti verðlaunin. Síðan þá hefur Leigh gert hvern gullmolann á fætur öðrum, m.a. Vera Drake (2004), sem vann Gull-ljónið í Feneyjum og tugi annarra verðlauna um víða veröld og Happy-Go-Lucky (2008) sem heillaði bæði gagnrýnendur og áhorfendur á hátíðum um allan heim,“ segir í tilkynningu.

• Blogga um frétt