Samferðamenn og aðdáendur Karls J. Sighvatssonar, sem lést um aldur fram árið 1991, ætla að efna til KARLSVÖKU, stórtónleika til minningar um Karl. KARLSVAKA verður haldin 12. september í Hörpu.
Gunnar Þórarson og félagar úr hljómsveitinni Trúbrot flytja lag tileinkað Karli, félagar úr Flowers rifja upp gamla takta og forsvarsmenn Minningarsjóðs Karls J. Sighvatssonar kynna styrkþega úr sjóðnum. Á fjórða tug hafa hlotið námsstyrk úr sjóðnum til framhaldsnáms, styrki til orgelkaupa, nótna- og geisladiskaútgáfu og ýmislegs annars.
Á KARLSVÖKU koma meðal annarra fram Hjaltalín, Ólafur Arnalds, Apparat Organ Kvartett og fjölmargir aðrir.
Myndbandið hér í fréttinni var tekið á blaðamannafundi í gær, þar sem KARLSVAKA var kynnt. Félagar Karls heitins tóku lagið eins og þeim einum er lagið.