Féll 15 metra á tískuvikunni í London

Áhorfendum Topshop-tískusýningarinnar á tískuvikunni í London var heldur betur brugðið þegar iðnaðarmaður féll í gegnum glerþak og lenti á bakinu. Atvikið átti sér stað í gær í miðri tískusýningu.

Talið er að maðurinn hafi fallið 15 metra áður en hann lenti á bakinu, áhorfendum til mikillar skelfingar. Meðal áhorfenda var fyrirsætan og sjónvarpskonan Alexa Chung. Sjónarvottar sögðu manninn hafa lent á auðu svæði og að viðstaddir hefðu aldrei verið í hættu. Maðurinn var fluttur á sjúkrahús í snatri.

„Það kom fát á fólk. Það héldu allir að einhver ljósabúnaður hefði dottið, þangað til öryggisverðir fóru að hlaupa til og kalla,“ sagði heimildarmaður Britain's Daily Telegraph.

Það sem þótti merkilegast var að tískusýningin hélt áfram eins og ekkert hefði ískorist.

• Blogga um frétt