Kanadísk-breska leikkonan og sjónvarpskynnirinn Lynda Bellingham er látin, hún var 66 ára að aldri.
Umboðsmaður Bellingham tilkynnti í dag að leikkonan hefði látist á spítala í London á sunnudaginn en hún glímdi við krabbamein.
„Lynda lést í örmum eiginmanns síns í gærkvöldi. Fjölskylda hennar, sem var henni kær, vill þakka starfsfólki spítalans fyrir stuðninginn og umhyggjuna,“ sagði umboðsmaður hennar m.a. í tilkynningu fyrr í dag.
Bellingham greindi frá því í seinasta mánuði að hún hygðist hætta í lyfjameðferð í nóvember til að geta notið jólanna. Bellingham fór í nokkur viðtöl til að tjá sig um ákvörðun sína um að hætta krabbameinsmeðferðinni, hún sagðist vera á góðum stað.
Bellingham er þekktust fyrir leik sinn í auglýsingum en hún var einnig kynnir spjallþáttarins Loose Women.