Síðan í desember á seinasta ári hefur söngkonan Britney Spears tekið þátt í sýningu í Planet Hollywood í Las Vegas. Miðasala á sýninguna hefur gengið vonum framar og hlaut Spears meira að segja launahækkun vegna velgengninnar.
Eftir 50 sýningar var ákveðið að Spears fengi ekki 37 milljónir króna fyrir hverja sýningu heldur 57 milljónir. Ekki nóg með að Spears fær meira í sinn vasa fyrir hverja sýningu heldur hefur sýningunum einnig verið fjölgað. Þessu er greint frá á heimasíðu TMZ. Þegar upp er staðið er Spears að þéna um 120 milljónir króna á viku í Las Vegas.
Þetta kemur sér eflaust vel fyrir Spears vegna þess að hún er sögð afar eyðslusöm, til að mynda eyðir hún um fjórum milljónum króna á ári í hundana sína.