Christian Bale mun fara með hlutverk Steves Jobs, eins stofnenda Apple, í væntanlegri kvikmynd. Aaron Sorkin, handritshöfundur myndarinnar, sagði Bale ekki hafa þurft að koma í áheyrnarprufu til að landa hlutverkinu.
„Við vildum fá einn besta leikara heims með okkur í lið. Hann þurfti ekki að koma í áheyrnarprufu. Við fórum á einn fund.“
Sorkin segir hlutverk Bales krefjandi en hann hefur fulla trú á honum. „Hann mun þurfa að tala meira í þessari mynd en flestir þurfa að gera í þremur myndum samanlagt. Það er ekkert atriði í myndinni sem Bale er ekki í.“
Fregnir herma þó að Leonardo DiCaprio hafi hafnað hlutverkinu upprunalega og því hafi framleiðendur myndarinnar leitað til Bales.