Áður en Michael Jackson lést árið 2009 borgaði hann vísindamönnum milljónir dollara fyrir rannsóknir sem höfðu það að markmiði að klóna hann. Þessu hefur rithöfundurinn Michael C. Luckman haldið fram.
Poppkóngurinn lést í júní 2009 eftir að hafa innbyrt of stóran skammt af lyfseðilsskylda lyfinu Propofol. Luckman heldur því fram að fyrir andlátið hafi Jackson komið lífsýnum sínum fyrir á rannsóknarstofum evrópskra vísindamanna, og borgað þeim fyrir að reyna að búa til eftirmynd af honum.
Ósk Jacksons var að eftirmyndin myndi bera arfleið hans eftir að hann myndi falla frá, og hafði hann því komið lífssýnum sínum fyrir á þremur mismunandi sjúkrahúsum í heiminum og vonaðist til að þau yrðu notuð eftir að hann létist. Luckman hefur haldið þessu fram og sagt upplýsingarnar hafa komið frá fatahönnuðinum Andre Van Pier, sem hannaði sviðsbúninga Jackson.
Luckman sagði í samtali við BANG Showbiz að Jackson hafi haft mikinn áhuga á klóni. „Michael vildi að þetta myndi gerast, og hann eyddi tíma og peningum í að ná markmiði sínu. Við gætum séð eftirmyndir margra látinna stjarna með framþróun í vísindum.“
Luckman hefur nýlega lokið við skrif á bók sinni „The Battle for Michael Jackson's Soul,“ eða Baráttan um sál Michael Jacksons. Í bókinni fjallar hann meðal annars um áhuga Jacksons á klóni.