Hollywood leikkonan Angelina Jolie ætlar að hætta að leika í kvikmyndum innan tíðar en hún stefnir á að leika í nokkrum myndum til viðbótar og síðan ætlar hún að leggja áherslu á leikstjórn og framleiðslu.
Kvikmynd Jolie, Unbroken, var frumsýnd í Sydney fyrr í vikunni en þetta er önnur kvikmyndin sem hún leikstýrir. Unbroken fjallar um ævi bandaríska hlauparans Louis Zamperini sem var hnepptur í fangabúðir Japana í seinni heimstyrjöldinni. Fyrri mynd hennar In the Land of Blood and Honey fjallaði um átökin í fyrrum Júgóslavíu.
Jolie segist ætla að leika í nokkrum myndum til viðbótar en svo muni hún láta gott heita. Hún segir að henni finnist frábært að leikstýra og það sé í raun mun skemmtilegra en að leika.