„Hann naut þess í botn. Segir landið fallegt og að kuldinn hafi alls ekki slegið hann út af laginu.“
Þannig hljómar svar Nicole Perez-Krueger, blaðafulltrúa bandaríska kvikmyndaleikarans Matthews McConaugheys, við fyrirspurn Sunnudagsblaðs Morgunblaðsins þess efnis hvernig leikaranum hafi líkað að vinna á Íslandi en nýjasta kvikmynd hans, Interstellar, var sem kunnugt er tekin að hluta hér á landi.
Líklega eitt stysta viðtal í 101 árs sögu Morgunblaðsins, ef ekki hreinlega það stysta, en svar eigi að síður frá afar niðursokknum manni. Er það vel. Í mörg horn er að líta hjá vinsælum kvikmyndaleikurum, sem sést líklega best á því að svarið barst ekki fyrr en réttum mánuði eftir að fyrirspurnin var lögð fram. McConaughey hlaut Óskarsverðlaunin fyrr á þessu ári fyrir frammistöðu sína í kvikmyndinni Dallas Buyers Club.