Tískugúrú gefur heimilislausum skó

Andre McDonnell er fertugur New York-búi sem fer um götur borgarinnar í frítíma sínum og gefur heimilislausu fólki pör af skóm. McDonnell starfar í tískuvöruverslun í SoHo, en á hverjum degi eftir vinnu tekur hann lestina um miðbæ borgarinnar þar sem hann hjálpar þeim sem á þurfa að halda.

Hugmyndin kviknaði hjá McDonnell fyrir þremur árum síðan, þegar hann spilaði körfubolta með vinum sínum. „Ég sá heimilislausan mann í engum skóm svo ég hætti að spila, fór úr skónnum og bauð honum að eiga þá. Hann tók við þeim með bros á vör,“ sagði hann í viðtali við New York Post.

„Þegar ég gekk í burtu fann ég fyrir malbikinu undir fótum mér, og þá skall það á mér að það hlyti að vera eitthvað meira sem ég gæti gert.“

Í kjölfarið stofnaði hann hreyfinguna „It's From the Sole“ sem hefur vakið mikla athygli. McDonnell tekur á móti skó-framlögum frá þeim sem vilja ganga til liðs við hreyfinguna, sem hefur það að markmiði að breyta jákvætt í samfélaginu.