Um 900.000 manns hafa horft á nýtt myndband á vinsælli íranskri mótmælasíðu, en það sýnir konu í frjálslegum dansi um borð í neðanjarðarlest í Tehran. Á Facebook-síðunni, My Stealthy Freedom, birtir fólk myndir og vídeó af konum brjóta gegn írönskum lögum um klæðaburð kvenna.
Þar í landi er ætlast til þess að konur gangi með höfuðklút, svokallaðan hijab, þegar þær eru úti meðal fólks en það er nokkuð svæðabundið hvernig reglunum er fylgt eftir. Í upphafi áðurnefnds myndbands er konan með hijab á höfði, en dansar klútinn síðan hreinlega af sér og lætur sér fátt um finnast.
Að láta vindinn leika um höfuð sér er ekki það eina sem konum er meinað að gera í Íran, því þær mega heldur ekki dansa á almannafæri, og karlar raunar ekki heldur. Fyrr á þessu ári var hópur ungmenna handtekinn fyrir að sprikla við lagið Happy með Pharrell Williams, en athæfið var tekið upp á vídeó.
Samkvæmt BBC virðist sem myndbandið af dansaranum í Tehran sé ófalsað, og umsagnir um uppátæki konunnar eru flestar jákvæðar, þótt sumir finni að danshreyfingunum sem slíkum.