Söngkonan Madonna varði þakkargjörðahátíðinni á munaðarleysingjahæli í Malaví. Þetta mun vera sama munaðarleysingjahæli og ættleiddu börnin hennar tvö bjuggu á.
Madonna hefur reglulega heimsótt Malaví eftir að hún stofnaði á sínum tíma góðgerðarsamtökin Raising Malawi sem m.a. vinna að því að útvega munaðarlausum börnum menntun. Madonna heimsótti svo Kondanani munaðarleysingjahælið í gær, hún fór ásamt tveimur börnum sínum, Mercy og David. Þau fögnuðu þakkargjörðarhátíðinni og skemmtu sér vel.
Madonna deildi ljósmynd á Twitter á meðan á heimsókninni stóð. Á myndinni situr Madonna í rólu og Mercy ýtir henni. Þá birti hún einnig mynd af Mercy og David fyrir utan gamla heimilið þeirra. „Heimurinn er á hvolfi. Verið þakklát fyrir lánsemi ykkar,“ skrifaði Madonna undir myndina.
Madonna heimsótti ekki aðeins munaðarleysingjahælið heldur skoðaði hún einnig Queen Elizabeth-spítalann og fundaði þar með þremur verðandi skurðlæknum. Madonna sló á létta strengi og heilsaði fólki að hætti innfæddra. „Muli bwanji,“ sagði hún og hló.