Í seinustu viku var greint frá því að tónlistarkonan Mel B dveldi á sjúkrahúsi. Engar upplýsingar fengust um hvað amaði að henni en í frétt Í Sky-sjónvarpsstöðvarinnar kom fram að Mel B væri mjög lasin og gæti mögulega ekki tekið þátt í úrslitum The X Factor sem fóru fram seinasta sunnudag. Mel B mætti þó á úrslitin en var þreytuleg að sjá. Nýjustu fregnir herma þá að Mel B hafi tekið ákvörðun um að skilja við eiginmann sinn, Stephen Belafonte, á spítalanum.
Heimildamaður The Sun sagði samband þeirra Mel B og Belafonte hafa verið stormasamt á undanförnum árum. En það sem á að hafa fyllt mælinn hjá söngkonunni var það að eiginmaður hennar kom ekki að heimsækja hana á spítalann.
„Þetta var mjög táknrænt. Hún tók giftingahringinn af sér áður en hún mætti á úrslit The X Factor á sunnudaginn. Hún vissi hvað hún vildi gera og hún ætlaði að senda honum skýr skilaboð,“ sagði heimildamaðurinn.
„Hann kom ekkert á spítalann,“ bætti heimildamaðurinn við.
Einhverjir netverjar hafa þá stungið upp á því að Mel B hafi þurft að leita á spítala vegna áverka sem eiginmaður hennar veitti henni en Belafonte þvertók fyrir það og birti skilaboð á Twitter. „Ég er ekki vanur að svara Twitter-skilaboðum en ég verð að svara þeim ásökunum að ég hafi beitt eiginkonu mína ofbeldi. Þetta er verulega ógeðslegt...og ósatt.“
Hvorki Mel B né Stephen Belafonte hafa tjáð sig um orðróminn um að þau séu að skilja.