Rihanna lenti í óhugnanlegu atviki í París í gær en aðdáendur hennar flykktust að henni og umkringdu hana. Rihanna kippti sér þó ekki mikið upp við múgæsinginn og brosti og veifaði aðdáendum sínum þegar lífvörður tók hana á háhest og kom henni út úr mannmergðinni.
Rihanna birti tilkynningu á heimasíðu sinni í gær og bað aðdáendur sína um að koma og hitta sig hjá Trocadero-brunnunum við Eiffelturninn. Aðdáendur hennar fengu aðeins nokkrar klukkustundir til að bregðast við þessari beiðni en mætingin var samt sem áður mjög góð. Þegar aðdáendur mættu á svæðið kom í ljós að tökur á nýju myndbandi frá Rihönnu voru að hefjast.
Þegar Rihanna mætti svo á svæðið tóku 100 æstir aðdáendur á móti henni. Þeir umkringdu hana þar til lífvörður hennar dró hana út úr mannþrönginni og setti hana á háhest. Rihanna virtist hafa gaman af þessu og veifaði og brosti. Þegar ástandið hafði róast hófust tökur á myndbandinu en þær stóðu aðeins yfir í um fimm mínútur samkvæmt heimildum Daily Mail.