Mannréttindi órangútans viðurkennd

Dómstóll í Argentínu hefur fallist á að Sandra, 29 ára gamall órangútan í dýragarðinum í Buenos Aires, skuli njóta sömu réttinda og menn. Dýragarðurinn hefur nú nokkra daga til að áfrýja niðurstöðunni eða sleppa Söndru ella úr prísund sinni.

Lögmenn dýraverndunarsamtaka í Argentínu héldu því fram að Sandra væri of gáfuð til að hægt væri að líta á hana sem hlut sem væri í eigu dýragarðsins. Höfðuðu þeir því mál þar sem því var haldið fram að Söndru væri haldið með ólögmætum hætti og vísuðu til ákvæða laga sem ætlað er að tryggja að handteknir menn séu leiddir fyrir dómara sem úrskurða um hvort frelsissvipting þeirra sé lögmæt. Dómstóllinn féllst á rök þeirra og verður Söndru því sleppt og hún flutt á griðasvæði. Hún hefur búið nær allt sitt líf í dýragörðum og því gæti hún trauðla lifað af úti í náttúrunni.

Forsvarsmenn dýragarðsins segja hins vegar að vel hafi verið hugsað um hana þar.

„Þegar þú þekkir ekki líffræði tegundar þá ertu að gera ein helstu mistök mannanna með því að fullyrða án raka dýrið verði fyrir misnotkun, það sé stressað eða þunglynt sem er að manngera hegðun dýra,“ segir Adrián Sestelo, yfirlíffræðingur dýragarðsins í Buenos Aires.

• Blogga um frétt