Bandaríski djassklarínettuleikarinn Buddy DeFranco er látinn 91 árs að aldri. DeFranco lést á aðfangadag á heimili sínu í Flórída.
DeFranco var meðal þekktustu djassleikara í Bandaríkjunum og var meðal annars sæmdur heiðurstitlinum Jazz Master af National Endowment for the Arts.
DeFranco fæddist í Camden í New Jersey en ólst upp í Fíladelfíu. Hann byrjaði að læra að leika á klarínett níu ára gamall.
Hann stýrði Glenn Miller Orchestra frá 1966 til 1974 og lék með helstu djassleikurum Bandaríkjanna, svo sem Art Tatum, Dizzy Gillespie og Charlie Parker.