Leikstjórinn Martin Scorsese hefur frá árinu 2012 unnið að heimildarmynd um Bill Clinton, fyrrum forseta Bandaríkjanna. Nú hefur hins vegar komið upp ágreiningur á milli Clintons og Scorseses og er því framtíð myndarinnar í óvissu.
Talið er að Clinton hafi viljað stíga inn á verksvið Scorseses með því að hafa lokaorðið þegar kemur að því að klippa til viðtölin. Scorsese neitaði því og er því framtíð myndarinnar í uppnámi.
Scorsese hefur lengi verið yfirlýstur aðdáandi Clintons og slóst hann meðal annars í för með hinum síðarnefnda til Suður-Afríku árið 2012.
Er þetta ekki eina kvikmyndaframleiðslan um Clinton sem er í uppnámi. Áður ákvað NBC að hætta við framleiðslu á þáttaröð um Hillary Clinton og einnig er óvissa um mynd sem kvikmyndaframleiðslufyrirtækið Lionsgate ætlaði að framleiða um þau hjón.