Angelina Jolie kallaði eftir aðstoð þegar hún hitti flóttamenn í Írak á sunnudaginn. Hún vakti athygli á stöðu flóttamannanna sem eru að flýja ástandið í Sýrlandi og hyggst setja af stað peningasöfnun.
„Síðan ég var seinast hérna í Írak hafa um tvær milljónir manna neyðst til að flýja heimili sín,“ sagði Jolie á blaðamannafundi sem haldinn var flóttamannabúðum í borginni Dohuk. Hún sagði að ástandið hefði haft áhrif á fólk um allan heim en að ekki næg hjálp hefði borist. Þá hvatti hún helstu leiðtoga heims til að koma saman og finna lausn á ástandinu.
„Fólkið sem ég hitti í dag þarf að vita að við stöndum með þeim. Þau verða að vita að einn dag munu þau geta snúið aftur heim.“