Geraldine McEwan, sem þekktust er fyrir að leika aldraða einkaspæjarann Miss Marple úr smiðju Agöthu Christie, lést í gær, 82 ára að aldri.
McEwan lék Jane Marple í sjónvarpsþáttum á ITV frá 2004 til 2009 en átti þá þegar áratugalangan feril að baki, bæði í sjónvarpi, kvikmyndum og leikhúsi. Árið 1983 vann hún verðlaun Evening Standard fyrir bestan leik aðalleikkonu í The Rivals. Árið 1991 vann hún svo Bafta-verðlaun sem besta leikkona í aðalhlutverki fyrir hlutverk sitt í sjónvarpsþáttunum Oranges Are Not the Only Fruit. Fjórum árum síðar vann hún aftur verðlaun Evening Standard fyrir leik sinn í The Way of the World.
Í yfirlýsingu frá börnum McEwan segir að hún hafi fengið heilablóðfall í október síðastliðnum og að hún hafi kvatt þennan heim í gær með friðsamlegum hætti.