Brúðkaupsathöfn hins 25 ára gamla Jugal og hinnar 23 ára gömlu Indiru var þegar hafin þegar brúðurin skipti skyndilega um skoðun.
Hér var þó ekki um flóttabrúður að ræða því í stað þess að stinga af ákvað brúðurin að ganga að eiga gest í brúðkaupinu í stað brúðgumans.
Þessi uppákoma átti sér stað í Indlandi við brúðkaupsathöfn að hætti hindúa. Stuttu eftir að athöfnin hófst fékk Jugal flogakast og hneig til jarðar en í stað þess að stumra yfir verðandi manni sínum fauk í brúðina. Hvorki Jugal né fjölskylda hans höfðu upplýst Indiru um að hann væri flogaveikur og að sögn Buzzfeed lýsti hún því yfir í reiði sinni að hún vildi frekar giftast gesti í brúðkaupinu að nafni Harpal Singh en sá mun hafa verið mágur systur hennar. Þrátt fyrir að vera nokkuð brugðið og hafa hikað í fyrstu lýsti Singh því að lokum yfir að hann væri tilbúinn að giftast Indiru.
Í kjölfarið var brúðgumunum einfaldlega skipt út og athöfnin hélt áfram. Á meðan á athöfninni stóð var Jugal hinsvegar færður meðvitundarlaus á spítala og þegar hann vaknaði var unnusta hans gift öðrum.