Uppskeruhátíðir skemmtanaiðnaðarins halda áfram og í gærkvöldi var komið að Brit-verðlaunum þar sem það besta úr breskri popptónlist á árinu er hafið upp til skýjanna og verðlaunað.
Af því tilefni var bandaríski rapparinn Kanye West fenginn til að halda uppi fjörinu sem hann gerði með því að frumflytja nýtt lag. Lagið heitir „All Day“ og þykir um margt í takt við síðustu plötu rapparans, Yeezus.
Lagið hefur vakið mikla athygli og hlotið nokkurt lof en ekki er öllum jafn skemmt því í sjónvarpsútsendingu hátíðarinnar brugðu stjórnendur á það ráð að slökkva einfaldlega á hljóðinu á meðan að Kanye lét „dónalegustu“ kaflanna dynja en þeir innihéldu mikla notkun á „n-orðinu“ svokallaða sem alls ekki má segja í bresku sjónvarpi.