Rigg viðburðir leita að fjórum kvenkyns dönsurum frá 18 ára aldri fyrir danshlutverk í tónleikasýningu með lögum Tinu Turner sem verður sett upp í Eldborg og Hofi, Akureyri í maí 2015.
„Við hvetjum alla sem telja sig verðuga í verkefnið og/eða vita af frambærilegum dönsurum að skrá sig til þátttöku með því að senda póst með upplýsingum um nafn, síma og fyrri verkefni (ef einhver eru) á netfangið rigg@rigg.is merkt í subject „Dansprufur Tina“,“ segir í tilkynningu frá stjórnendum sýningarinnar.
Dansararnir sem verða fyrir valinu verða afhjúpaðir í beinni útsendingu á undanúrslitakvöldi Ísland got talent hinn 22. mars þar sem atriði úr sýningunni verður flutt ásamt söngvurum og hljómsveit.
Danshöfundur sýningarinnar er Yesmine Olsson en um búninga sér Filippía Elísdóttir. Stjórnandi er Friðrik Ómar Hjörleifsson.