Læknirinn Sanjay Khurana, sem var á meðal þeirra fyrstu sem komu bandaríska leikaranum Harrison Ford til aðstoðar eftir að einkaflugvél hans brotlenti í gærkvöldi, segir leikarann stálheppinn að vera á lífi.
Flugvélin brotlenti á golfvelli rétt fyrir utan borgina Los Angeles.
Í samtali við bandaríska fjölmiðla í dag sagðist Khurana ekki hafa trúað sínum eigin augum þegar hann sá vélina brotlenda, nokkuð harkalega. Hann var þá að spila sjöundu holu golfvallarins.
Hann var á meðal þeirra sem komu fyrst á vettvang og dró Harrison Ford út úr flugvélinni. Hann áttaði sig ekki strax á því hver maðurinn væri, ekki fyrr en búið var að draga hann út úr vélinni.
Harrison Ford er 72 ára gamall en hann er meðal annars þekktur fyrir leik í Indiana Jones- og Star Wars-myndunum.
Hann flaug tveggja sæta Ryan PT-22-vél en vélin er ein margra sem framleiddar voru í seinni heimsstyrjöldinni og notaðar við að þjálfa bandaríska herflugmenn. Ford er þrautþjálfaður flugmaður.
Fréttir mbl.is:
Harrison Ford ekki í lífshættu