Blússandi sigling á Grétu Salóme

Gréta Salóme Stefánsdóttir hefur sent frá sér nýtt lag sem heyrst hefur í útvarpi síðustu daga. Lagið nefnist „Í dag“ og er hluti af plötu sem mun koma út síðar á árinu.

Þetta er þó ekki það eina sem tónlistarkonan knáa úr Mosfellsbænum hefur á prjónunum en henni hefur  einnig verið boðið að setja upp glæsilega tónlistarsýningu í Menningarhúsinu Hofi á Akureyri og leika með Sinfóníuhljómsveit Norðurlands á tónleikum sem nefnast Disney-Frozen. Þar mun hún flytja efni sem hún hefur þegar flutt fyrir þúsundir manna á Disney Dream skipinu, sem er eitt stærsta skemmtiferðarskip Disney-samsteypunnar. Eins og greint var frá í gær mun Sinfóníuhljómsveitin einnig hljóðrita undirspil fyrir tónleika Grétu í téðu skemmtiferðaskipi en sú upptaka er liður í tilraunaverkefni sveitarinnar til að ná til kvikmyndaiðnaðarins.

Nýlega var sagt frá því að hún verði svokallaður ,,headliner” á  Disney Magic skipinu sem mun sigla til Evrópu í sumar. Skipið mun meðal annars hafa viðkomu á Íslandi tvisvar sinnum. Sýningin hennar nefnist „The Greta Salóme show – Strings of Magic“, og eru glæsilegir tónleikar í stærsta leikhúsinu þeirra, Walt Disney Theater. Þar heldur hún 45 mínútna tónleika í hverri einustu siglingu og nýtur aðstoðar leikstjóra, dansara, búningahönnuða osfrv. Á tónleikunum leikur hún sitt eigið efni auk þess að leika og syngja þekkt lög í hennar útsetningum. 

• Blogga um frétt