Aðdáendur hljómsveitarinnar Destiny's Child tóku gleði sína að nýju í gær þegar sveitin kom saman í fyrsta skiptið frá árinu 2013. Þær Beyoncé, Kelly Rowland og Michelle Williams tóku lagið á gospelhátíðinni Stellar Gospel Music Awards í Las Vegas.
Tóku þær lagið Say Yes eftir Michelle Williams, sem er upprunalega byggt á gospellaginu When Jesus Says Yes. Þær voru ekki með eggjandi dansspor, eða klæddar í litskrúðuga kjóla líkt og þær voru þekktar fyrir á sínum tíma, heldur var atriðið einfalt.
Á hátíðinni hlaut Michelle Williams einnig verðlaun fyrir besta gospelmyndbandið, við lagið Say Yes.