Yfirgaf heimili sitt um miðja nótt

Fjögurra ára stúlka yfirgaf heimili sitt um miðja nótt í Fíladelfíuborg í Bandaríkjunum til þess að fara og kaupa sér ískrap. Á upptöku eftirlitsmyndavéla má sjá hina ungu Annabel Ridgeway stíga um borð í strætisvagn um klukkan þrjú um nótt. Var stúlkan blaut og köld er hún komst í strætisvagninn, en þessa nótt hellirigndi í borginni.

Samkvæmt frétt Sky-fréttastofunnar sagði Annabel hinum farþegunum í strætisvagninum að hún hefði klætt sig og farið út um útidyrnar á heimili sínu til þess að næla sér í ískrap.

„Hún vissi nákvæmlega hvert hún var að fara,“ sagði strætisvagnsstjórinn Harlan Jenifer. „Hún hlýtur að hafa farið þessa leið áður.“

Jenifer, sem á sjálfur börn, sagðist hafa gert „það sama og hvaða faðir sem er“ og stöðvaði vagninn. Hringdi hann í lögreglu sem kom stúlkunni á sjúkrahús.

Þar var hún sótt af móður sinni. Að sögn yfirvalda höfðu foreldrar Annabel ekki hugmynd um að hún hefði vaknað og yfirgefið heimilið um miðja nótt. Samkvæmt frétt Sky voru þau þó svo glöð að endurheimta barnið að þau samþykktu að fara með hana í búð og kaupa handa henni ískrap. 

Hér fyrir neðan má sjá upptökur úr eftirlitsmyndavél strætisvagnsins þar sem Annabel var farþegi.

• Blogga um frétt