Kvikmyndin Furious 7, sem er einmitt sjöunda myndin í röð Fast and Furious-myndanna hefur nú halað inn yfir milljarð Bandaríkjadala. Engin kvikmynd í sögu Universal Studios hefur halað inn jafnmiklu á svo stuttum tíma, eða aðeins 17 dögum.
Alls hafa myndirnar sjö halað inn 3,39 milljörðum dala og því ljóst að vinsældir nýjustu myndarinnar eru gríðarlegar.
Er myndin nú þegar komin í 20. sæti yfir tekjuhæstu myndir allra tíma, rétt fyrir ofan Lion King og rétt á eftir Batman: The Dark Knight. Efst trónir kvikmyndin Avatar með 2,78 milljarða í tekjur og er hin sígilda Titanic í öðru sæti með 2,1 milljarð í tekjur.
Forsvarsmenn Universal tala í fjölmiðlum um The Paul Walker Effect - vegna þess að einn aðalleikari myndarinnar, Paul Walker, lést á meðan á tökum stóð. Er hann tölvugerður í stórum hluta myndarinnar. Hefur það eflaust leitt til þess að myndin hefur hlotið meiri athygli en ella.