Veröld/Fólk | mbl | 22.4.2015 | 13:07

„Við erum gul og glöð“

Stuðningsmenn Brekkubæjarskóla fjölmenna í kvöld Ljósmynd/Skólahreysti

Brekkubæjarskóli vann Vesturlandsriðilinn í Skólahreysti og keppir því til úrslita í kvöld. Er þetta besti árangur skólans frá upphafi en hann hefur aldrei áður komist í úrslitakvöldið.

Írena Rut Elmarsdóttir keppir í hraðaþrautinni en hún er að taka þátt í annað sinn í Skólahreysti. Hún æfir fimleika og eru íþróttir almennt hennar helsta áhugamál. Með henni í hraðaþrautinni er Anton Elí Ingason en hann er að taka þátt í fyrsta skipti. Hann æfir Parkour sem snýst um að hlaupa, hoppa og klifra yfir eitthvert svæði á miklum hraða. Hans helsta áhugamál eru íþróttir.

Birta Martgrét Björnsdóttir vindur sér í armbeygjur og hreystigreip en hún er nýliði í keppninni. Hún æfir fótbolta og hefur mikinn áhuga á íþróttum. Birta er mikil dýramanneskja, á hund og tvo ketti og væri til í fleiri dýr. Svavar Örn Sigurðsson dýfir sér í dýfur og upphífingar en hann er að taka þátt í annað sinn. Hann æfir fótbolta og elskar pítsur og hamborgara.

Sigríður H. Gunnarsdóttir er þjálfari liðsins ásamt Brynjari Sigurðssyni. Hún er spennt að taka þátt í úrslitakvöldinu. „Það er mikil spenna og menn í skólanum eru mjög ánægðir með árangurinn hingað til. Við erum gul og glöð“ sagði Sigríður í samtali við mbl.

Hún sagði að stemningin í skólanum væri góð. „Það er búið að vera gult þema í dag og krakkarnir hittust í samsöng þar sem þau æfa sig, einhverskonar stemningsstund. Við tökum 85 áhorfendur með í kvöld.“

Brekkubæjarskóli hefur aldrei lagt áherslu á að vinna Skólahreysti, það er engin pressa frá stjónendum eða kennurum. Krakkarnir í liðinu eru miklir íþróttagormar og æfa því að mestu leyti sjálf fyrir keppni. „Við höfum þó aðeins haldið þeim við efnið og láti þau spreyta sig á æfingum líkum þeim sem gætu komið í keppni í leikfimitímum. Við segjum að krakkarnir fari í keppni og geri sitt besta og ef þau gera sitt besta er það flottur árangur.“

Skólahreysti vekur athygli og keppendur fyrir hönd skólans eru stjörnur innan veggja hans. „Krakkarnir í fyrsta og öðrum bekk líta mjög upp til þeirra og eru stöðugt að spyrja hvenær þau geti tekið þátt í Skólahreysti,“ sagði Sigríður að lokum.