Íslendingar eru þjóða spenntastir fyrir Eurovision. 99% Íslendinga fylgdust með lokakeppni Eurovision í fyrra, allavega ef marka má niðurstöður Francesca Cimino, fjölmiðlagreinanda hjá Sambandi evrópskra sjónvarpsstöðva (ECB). Þetta kemur fram í frétt austurríska blaðsins Der Standard.
Ísland er að vísu það land, sem tekur þátt í keppninni, sem er með hvað fæsta áhorfendur á keppnina, í kringum 200.000. Samkvæmt Der Standard eru það hins vegar um 69% þjóðarinnar. Til samanburðar horfðu „einungis“ 15% Breta á lokakeppnina, heilar 8,7 milljónir manna.
Íslendingar eru ekki eina Norðurlandaþjóðin sem hefur botnlausan áhuga á Eurovision, því um 70% frænda okkar í Skandínavíu fylgdust með keppninni. Eurovision vekur hins vegar hvað minnstan áhuga í Georgíu, þar sem 1% sjónvarpsáhorfenda fylgdust með keppninni. Á Ítalíu og í Úkraínu var áhorfið tæplega 10%, en meðaltalið fyrir alla Evrópu er í kringum 37%.
Keppnin í ár fer fram í Austurríki. Ísland keppir í seinni forkeppninni 21. maí, en lokakeppnin er 23. maí.