Poppstjarnan Chris Brown neitaði því í dag að hann hafi lent í átökum í spilavíti í Las Vegas í nótt. Lögregla hefur nú stefnt söngvaranum fyrir að kýla mann á körfuboltavelli.
Það vakti heimsathygli þegar Brown kýldi þáverandi kærustu sína Rihanna árið 2009. Brown, sem nú er 25 ára gamall, hefur verið sakaður um að kýla óvopnaðan mann í miðjum körfuboltaleik á spilavítinu.
Lögreglumenn voru kallaðir til á sjúkrahúsi snemma í morgun þar sem að meinta fórnarlamb Brown sagðist hafa verið barinn af söngvaranum.
Samkvæmt tilkynningu lögreglunnar í Las Vegas hafði fórnarlambið verið að spila körfubolta í spilavítinu þegar að árásin átti sér stað. Hann og Brown fóru að rífast sem leiddi til slagsmála.
Fjölmiðlafulltrú Brown hefur þó neitað því að söngvarinn hafi tekið þátt í slagsmálunum. „Chris er í Las Vegas og er með herbergi á hóteli sem er með körfuboltavöll og bauð vinum sínum að koma og spila. Óstýrilátur einstaklingur kom óboðinn og var fjarlægður af svæðinu,“ sagði fjölmiðlafulltrúinn.
„Chris lenti ekki í átökum við þennan einstakling,“ bætti hann við.
Í tilkynningu lögreglu kemur fram að rannsóknarlögreglumenn hafi farið í spilavítið til þess að ræða við Brown án árangurs.
Árið 2009 játaði Brown að hafa ráðist á Rihanna sem særðist á andliti í kjölfarið. Hún gat ekki komið fram á Grammy verðlaununum næsta kvöld vegna áverkanna.
Brown fékk fimm ára skilorðsbundinn dóm og var gert að vinna samfélagsþjónustu í 180 daga. Skilorðinu var aflétt í mars.