Kona frá Tennessee í Bandaríkjunum leitaði að ókunnum manni sem hún kyssti í Boston maraþoninu í apríl. Hún fékk loks svar - frá eiginkonu hans.
Barbara Tatge segir að dóttir hennar hafi manað hana til að kyssa ókunnugan, myndarlegan mann er hún tók þátt í hlaupinu er hún hljóp í gegnum bæinn Wellesley. Hefð er fyrir því að kvenkyns nemar Wellesley-háskólans kyssi karlkynshlaupara í hlaupinu og fannst mæðgunum tímabært að snúa þessu við.
Eftir hlaupið fór svo dóttirin á samfélagsmiðla og reyndi að hafa uppi á manninum sem móðir hennar hafði kysst, enda hafði kossinn greinilega haft áhrif á hana.
Tatge segir að hún hafi svo fengið bréf frá ritstjórnarskrifstofu dagblaðs í Wellesley á sunnudag eftir að leitin að hinum ókunnuga, myndarlega manni hafði fengið heimsathygli.
Bréfið var frá eiginkonu mannsins. Í því sagði að þau hjónin hefði gaman að uppátækinu og athyglinni en vildu þó alls ekki láta nafna sinna getið.
„Þegar frétt um þetta komst í heimspressuna vorum við nokkuð undrandi,“ segir eiginkonan í bréfinu. „Hvað mig varðar, þá er ég ekki reið, trúið mér vinir mínir hafa fengið nóg að hlæja að og ég hef algjörlega notið þess að grínast í manninum mínum með þetta!“
Eiginkonan hélt svo áfram: „Þó að þetta sé ekki endirinn á ævintýrinu sem þú kannski óskaðir þér þá fangaði þetta uppátæki þitt skemmtunina, orkuna og andann í Boston-maraþoninu. Ég dáist að framhleypni þinni og kjarki og óskað þér alls hins besta í framtíðinni.“
Tatge skrifaði eiginkonunni til baka og þakkaði fyrir skemmtilegt bréf. „Hún er skemmtileg og hann er heppinn að vera giftur henni.“