Nýjasta kvikmynd Marvel Studios um Captain America verður að hluta til tekin upp hér á landi. Þetta kemur fram í frétt á vefnum www.comingsoon.net.
Þar kemur fram að tökur eru hafnar á kvikmyndinni, sem heitir Captain America: Civil War, í Atlanta í Georgíu í Bandaríkjunum. Myndin verður einnig tekin upp í Þýskalandi, Púertó Ríkó og Íslandi.
Áætlaður útgáfudagur myndarinnar er 6. maí á næsta ári. Leikstjórar myndarinnar eru Anthony og Joe Russo en þeir leikstýrðu síðustu mynd um Captain America, The Winter Soldier. Sú mynd kom út á síðasta ári.
Bandaríski leikarinn Chris Evans snýr aftur í hlutverk sitt sem Steve Rogers eða Captain America ásamt Robert Downey Jr. sem fer með hlutverk Tony Stark eða Iron Man.
Fjölmargar aðrar stjörnur koma fram í myndinni, m.a. Scarlett Johansson, Sebastian Stan, Anthony Mackie, Paul Bettany og Jeremy Renner.
Hér má sjá fréttina í heild sinni.