„Hann er pottþétt með gæsalifur á pizzunni“

Mikið er nú rætt við Jonas Gahr Støre, leiðtoga Verkamannaflokksins í Noregi á samfélagsmiðlum eftir að hann birti mynd af sér á Facebook-síðu sinni, japlandi á pizzu. Þykir myndin minna á fræga mynd af Ed Miliband, leiðtoga Verkamannaflokksins í Bretlandi, sem gæddi sér á girnilegri samloku í viðurvist ljósmyndara.

Støre var í heimsókn í verksmiðju sem framleiðir hina frægu Grandiosa-pizzu sem er mest selda pizzan í Noregi og má að mörgu leiti líkja við þjóðarrétt þeirra Norðmanna. Er talið að með myndinni hafi Støre viljað sýna sjálfan sig í alþýðulegum aðstæðum en gagnrýnendur hans tala mikið um að hann komi úr efnaðri fjölskyldu og þekki lítið til aðstæðna verkamanna í landinu. 

Viðbrögðin létu ekki á sér standa á samfélagsmiðlum og sitt sýndist hverjum um þetta uppátæki Støre. „Hann er pottþétt með gæsalifur á pizzunni,“ skrifar einn notandinn. „Ok, þetta er það sem verkamennirnir borða,“ skrifar annar.

Sjá frétt Dagbladet.

Myndin af Støre þykir minna á þessa mynd af Ed Miliband, fyrrum leiðtoga Verkamannaflokksins í Bretlandi.

• Blogga um frétt