Franskur kráareigandi var í gær dæmdur í skilorðsbundið fangelsi fyrir manndráp en gestur á kránni lést eftir að hafa drukkið 56 „áfengisskot“ og þar með sett nýtt drykkjumet á kránni. Samkvæmt dómi héraðsdóms í Clermont-Ferrand er andlát mannsins á ábyrgð eiganda kráarinnar.
Renaud Prudhomme, 56 ára, setti drykkjumet á kránni Starter í október í fyrra eftir að hafa innbyrt 56 áfengisskot. Prudhomme hafði eytt kvöldinu á kránni við drykkju ásamt dóttur sinni og vinum og þurfti á þeirra hjálp að halda til þess að skrönglast heim um nóttina. Fljótlega eftir heimkomuna missti hann meðvitund og hringdu vinir hans á sjúkrabíl. Prudhomme, sem var stór og mikill og vó 120 kg, lést um nóttina á sjúkrahúsi.
Eigandi kráarinnar Gilles Crepin, 47 ára, viðurkenni við réttarhöldin að hann hafi gert mistök með því að skrá drykkjumet staðarins á krítartöflu á barnum og hvetja með því fórnarlambið til dáða.
Crepin var dæmdur í fjögurra mánaða skilorðsbundið fangelsi og bannað að starfa á krá í eitt ár. Hann ætlar að áfrýja dómnum.