Margmenni var samankomið við Stein á Esjunni í kvöld þegar tónlistarmaðurinn Ásgeir Trausti steig þar á svið.
Tónleikarnir hófust 45 mínútum á eftir áætlun og þurfti því skarinn að bíða nokkra stund en Ásgeiri og föruneyti hans var þeim mun betur fagnað þegar hann söng fyrstu nóturnar.
Áheyrendur voru á öllum aldri og af öllum stærðum og gerðum. Svipaða sögu var að segja af útbúnaði fólks, en þótt flestir væru vel búnir mátti sjá nokkra tónleikagesti á stuttermabolum og fréttamaður Stöðvar 2 mætti í jakkafötum. Ljósmyndari mbl.is fangaði myndirnar hér að ofan og sagði hann marga hafa dansað og fjöldi aðdáenda hefði fengið myndir af sér með Ásgeiri, bæði fyrir og eftir tónleikana.