Hann var allt annað en sáttur, bréfberinn sem ber út bréfin í bænum Utrecht í Hollandi þegar hann kom að lokaðri götu vegna hjólreiðakeppninnar Tour de France. Hann snöggreiddist og ætlaði að æða inn á götuna í veg fyrir hjólreiðamennina.
Hjólreiðakeppnin Tour de France hófst á laugardag þegar keppendurnir kepptu í tímatöku á götum Utrecht. Bréfberinn, sem sjálfur var á hjóli, lyfti hjólinu sínu yfir lokunina og ætlaði að æða út á veginn þegar starfsmenn keppninnar stöðvuðu hann. Hann hreytti þá út úr sér á ensku: „Ef þú snertir mig þá slæ ég úr þér tennurnar,“ áður en til smávægilegra handalögmála kom á milli hans og brautarvarðarins.
„Komdu þér í burtu, ég er með 80 kg poka af bréfum hérna,“ bætti þá bréfberinn við.
Að sögn hollenskra fjölmiðla á bréfberinn að hafa beðist afsökunar á atvikinu stuttu síðar. „Starfsmaður okkar var búinn að vinna marga daga í röð í miklum hita og hafði tekið á sig mikla aukavinnu. Þetta er engin afsökun en útskýrir hegðunina,“ segir í tilkynningu frá fyrirtækinu sem maðurinn starfaði hjá.