Rapparinn Snoop Dogg var stöðvaður af lögreglunni á flugvellinum í Calabria í suðurhluta Ítalíu í dag, en hann var með 422 þúsund evrur, sem jafngildir um 62 milljónum króna, í reiðufé í farangri sínum.
Samkvæmt lögum má ekki ferðast á flugvöllum innan Evrópusambandsins með meira en tíu þúsund evrur í reiðufé, nema að gera yfirvöldum viðvart um það.
Rapparinn var tekinn afsíðis af lögreglumönnum sem lögðu hald á um helming reiðufjárins, en þeim er það heimilt samkvæmt lögum á Ítalíu um peningaþvætti, að sögn fjölmiðla þar í landi. Hins vegar þykir líklegt að Snoop Dogg fái reiðufé sitt til baka. Hann þarf hins vegar að greiða sekt.
Snoop Dogg er á tónleikaferðalagi um Evrópu um þessar mundir.
Eins og kunnugt er var hann handtekinn í Uppsölum í Svíþjóð um seinustu helgi vegna gruns um að hann væri undir áhrifum fíkniefna. Hafði sænska lögreglan afskipti af honum eftir tónleika sem hann hélt í bænum.