„Meiri líkur á að sjá geimveru en Asíubúa“

Ensk/kínverska leikkonan Emma Chan segir bæði rasisma og kynþáttafordóma ríkjandi þegar valið er í hlutverk í Hollywood. Í viðtali við Telegraph sagði hún að sér hefði oft verið hafnað vegna þess að „þau voru að leita að hvítri manneskju.“

Chan er hálf kínversk og leikur í bresk/bandarísku þáttunum „Humans.“ Hún segir málin hálf niðurdrepandi. „Tölfræðin er niðurdrepandi. Ég man að ég las eitthvað sem lét mig hugsa „það eru meiri líkur á að sjá geimveru í Hollywood mynd en asíska konu.““

Chan ólst upp í Englandi og segist ekki hafa átt neinar leikarafyrirmyndir á yngri árum. „Ég sá aldrei Asíubúa á skjánum þegar ég var yngri. Þess vegna hélt ég að það væri ekki raunhæft að stefna á leiklist.“