Breska hljómsveitin Simply Red heldur stórtónleika í Laugardalshöll 31. maí. Hljómsveitin, sem hefur selt yfir 60 milljónir platna á ferli sínum, mun flytja öll sín vinsælustu lög á hljómleikunum en ef þú þekkir þau ekki nú þegar munt þú aldrei, aldrei, aldrei þekkja þau.
Á næsta ári eru nákvæmlega 30 ár síðan Simply Red spilaði hér í sitt fyrsta og eina skipti á eftirminnilegum tónleikum í Laugardalshöll ásamt Fine Young Cannibals, Lloyd Cole and the Commotions og Madness. Þá voru þeir nýbúnir að gefa út fyrstu plötuna sína Picture Book, sem sló rækilega í gegn.
Að sögn tónleikahaldara hafa Mick Hucknall og félagar engu gleymt. Segja megi að þeir hafi aldrei verið betri, með eina flottustu rödd poppsögunnar og alla sína smelli í farteskinu. Það má því búast við frábærum tónleikum þegar Simply Red stígur á svið Laugardalshallarinnar í maí á næsta ári.
Miðasala hefst þriðjudaginn 13. október kl 10:00 á midi.is