Heimildamyndin Stúlkurnar á Kleppjárnsreykjum - Lauslæti og landráð, eftir Ölmu Ómarsdóttur verður frumsýnd í Bíó Paradís á fimmtudaginn.
Myndin segir frá myrkum kafla í Íslandssögunni, þegar yfirvöld stunduðu njósnir um konur og beittu ungar konur þvingunum og sviptu þær frelsi fyrir það eitt að eiga í samskiptum við erlenda setuliðsmenn á tímum seinni heimsstyrjaldarinnar.
Skömmu eftir hernámið í seinni heimsstyrjöldinni fór allt á annan endann í íslensku samfélagi vegna samskipta kvenna við setuliðið. „Ástandsstúlkur“ voru fordæmdar í dagblöðum og ráðamenn þjóðarinnar töluðu um að lauslæti og skækjulifnaður ógnaði íslensku þjóðerni og þjóðarsóma. Í kjölfarið var gripið til fordæmalausra mannréttindabrota; sjálfræðis- og frlesissviptinga ungra kvenna undir yfirskyni björgunar. Heimildamyndin Stúlkurnar á Kleppjárnsreykjum: Lauslæti og landráð sviptir hulunni af myrkum kafla sögunnar sem hefur legið í þagnargildi í áratugi.
Leikstjóri myndarinnar er Alma Ómarsdóttir. Hún er með Mastersgráðu í blaða- og fréttamennsku frá Háskóla Íslands. Við gerð myndarinnar fékk Alma aðgang að gögnum á Þjóðskjalasafni Íslands, sem eru lokuð almenningi og hafa verið innsigluð í áratugi. Alma er fréttamaður hjá RÚV. Hún hefur áður gert stuttu heimildamyndina Maður verður að vera flottur, sem segir frá ungri konu sem tekur þátt í módelfitness. Hún var valin til sýningar á Reykjavik Shorts&Docs árið 2013 og hefur síðan verið sýnd á kvikmyndahátíðum víða um heim.